Vuçiq këmbëngul: Ose të formohet Asociacioni ose vetëm mund t’iu them faleminderit

Presidenti i Serbisë, Aleksandar Vuçiq, është deklaruar vetëm pak ditë para takimit me kryeministrin e Republikës së Kosovës, Albin Kurti, në Bruksel.

Vuçiq është shprehur i prerë, teksa ka thënë se duhet me doemos të zgjidhet çështja e Asociacionit të Komunave me shumicë serbe.

“Të gjithë e dinë se thelbi është Asociacioni i komunave me shumicë serbe – ose do ta zgjidhni problemin e Asociacionit ose vetëm mund të ju them faleminderit, kaq”, ka thënë Vuçiq.

I pyetur nëse duhet zyrtarizuar me shkrim pranimi i propozimit të Bashkimit Evropian, Vuçiq thotë Serbia mbetet në vijat e kuqe rreth çështjes së Kosovës.

Ai thotë se Serbia do t’i përmbahet asaj për të cilën foli në seancën e këtij muaji të Kuvendit të Serbisë për Kosovën “pa marrë parasysh çfarë dhe sido që të jetë”.

Në anën tjetër, kryeministri Kurti këtë javë duke folur për çështjen e Asociacionit, tha shpreson që diskutimet të jenë të fokusuara tek nisa franko-gjermane, dhe jo tek “interesat e njërës palë”.

“Në kemi propozimin me iniciativën franko gjermane. Ne presim që të ketë diskutime dhe të ecim përpara në bazën e atij diskutimi. Jo pak varet nga fascilituesit apo ndërmjetësuesit pas ditës së hënë e dimë”- ka thënë Kurti.

Bashkimi Evropian gjatë ditës së djeshme ka bërë të ditur agjendën e takimit në Bruksel.

Siç bëhet e ditur në faqen zyrtare të Zyrës për Politikë të Jashtme dhe Siguri, Josep Borell dhe Miroslav Lajçak fillimisht do të zhvillojnë takime të ndara me Kurtin e Vuçiqin. Këto takime do të fillojnë në orën 15:00.

Ndërsa, pas kësaj do të ketë një takim të përbashkët.

“Në takim do të diskutohet për propozimin e BE-së për normalizim të raporteve në mes të Kosovës dhe Serbisë”, thuhet në njoftimin zyrtar të Brukselit.

Në fund të takimit bëhet e ditur se do të ketë deklaratë për media nga Përfaqësuesi i Lartë i BE-së, Josep Borrell.

Pjesëmarrjen në takim e kanë konfirmuar edhe Kurti edhe Vuçiq.

Ndryshe, Përfaqësuesi i Lartë i Bashkimit Evropian për Punë të Jashtme dhe Politikë të Sigurisë, Josep Borrell, ka thënë se shpreson që Kosova dhe Serbia të pranojnë propozimin evropian, si rrugë për normalizim të marrëdhënieve./Veriu.info/