(VIDEO)Kamionë e blinda të KFOR-it shihen në drejtim të Mitrovicës

Portali lokal, Veriu Info, ka publikuar një video ku thuhet se mjete të rënda motorike të KFOR-it, janë parë rrugës për në Mitrovicë. Këto mjete të KFOR-it janë parë në hyrje të Vushtrrisë.

Në këtë video shihen kamionë të cilët mund të përdoren për largimin e barrikadave në veri të vendit, por edhe për stërvitjet e rregullta të cilat janë paralajmëruar se do të mbahen këto ditë në bazë ushtarake në Novo Sellë.

Në anë tjetër, sot janë bërë 10 ditë që nga vendosja e barrikadave në pjesën veriore të Kosovës.

Aktualisht situata raportohet të jetë e qetë teksa gjatë së dielës, në anën serbe të pikës kufitare në Jarinje u protestua.Për këtë protestë, KFOR-i e ka pranuar se brenda protestuesve në Jarinjë mund të ketë pasur grupe të organizuara kriminale.

Kujtojmë se SHBA dhe BE kanë bërë thirrje që “menjëherë” të largohen barrikadat e vendosura në Zveçan, Zubin Potok e Leposviq, komuna këto që shtrihen në pjesën veriore të Kosovës.