Kurti zgjohet me reagim për veriun – U dërgon mesazhe ndërkombëtarëve dhe serbëve në veri

Pas aksionit të djeshëm të Policisë së Kosovës për t’iu mundësuar kryetarëve në veri që të nisin punën e tyre ka reaguar qysh në mëngjesin e sotëm kryeministri Albin Kurti, duke ftuar serbët e veriut që të bashkëpunojnë me kryetarët e rinj dhe kabinetet e tyre që sipas tij do të jenë multi-etnike, multi-kulturore, multi-gjuhësore dhe multi-partiake, raporton Gazeta10.

Tutje Kryeministri Kurti u dërgoi mesazh dhe ndërkombëtarëve duke thënë se çdo opsion tjetër, do të ishte mos përmbushje e obligimeve kushtetuese të Qeverisë sonë ndaj kryetarëve të rinj.

“Ne jemi të vetëdijshëm dhe i kuptojmë shqetësimet e ngritura nga partnerët tanë ndërkombëtarë. Por, çdo opsion tjetër, do të ishte mos përmbushje e obligimeve kushtetuese të Qeverisë sonë ndaj kryetarëve të rinj; do të ishte mos përmbushje e obligimeve dhe detyrimeve të kryetarëve të rinj ndaj qytetarëve të Republikës; dhe, do të pamundësonte ofrimin e shërbimeve bazike komunale për qytetarë”, ka shkruar Kurti.

Sipas tij shkuarja e kryetarit të komunës në vendin e tij të punës do duhej të ishte gjëja më normale e mundshme.

“Objekti i ndërtesës së komunës është vendi ku u shërbehet qytetarëve mbi bazën e ligjit e kushtetutës. Ai i takon Republikës prandaj edhe nuk është marrë dje e nuk do të merret asnjë ditë tjetër”, tha Kurti.

Ai ka ftuar qytetarët serbë të Kosovës, që të bashkëpunojnë me kryetarët e rinj dhe kabinetet e tyre, të cilat do të jenë multi-etnike, multi-kulturore, multi-gjuhësore dhe multi-partiake. Sipas tij ata janë të zgjedhur dhe nuk janë kundër askujt, por në shërbim të të gjithëve.

Kurti ka falënderuar pjesëtarët e Policisë së Republikës së Kosovës siç ka thënë për qëndrimin e tyre profesional, shtetëror dhe në mbrojtje të sundimit të ligjit.

“Ata, siç dëshmojnë çdo ditë, e dëshmuan edhe dje, që janë të gatshëm për t’i shërbyer rendit, ligjit e Republikës si profesionistë, të patrembur e dinjitozë, në afirmimin e një ambienti multi-etnik të sigurisë, pavarësisht kushteve të rënda që shkaktuan grupet e menaxhuara nga struktura parapolitike në atë pjesë të vendit”, ka thënë tutje Kurti.

Sipas tij rendi dhe ligji, demokracia dhe lëvizja e lirë, siguria dhe paqja, mund dhe duhet të ecin krah për krah. Për këto angazhohemi çdo ditë dhe në përpikëri.

Kurti në fund ka njoftuar që rrugët në veri janë që të gjitha të hapura e të qarkullueshme për qytetarët. Komunat dhe kryetarët duhet të punojnë shumë sepse kemi shumë punë për të bërë për qytetarët.